Иргэний үнэмлэх шинэчлэхгүй, регистрийн дугаар солихгүй гэлээ

УБЕГ-аас “Олон нийтэд тархсан ташаа мэдээллийг залруулахад, иргэний үнэмлэхийг шинэчлэхгүй. Регистрийн дугаарыг хүчингүй болгохгүй. Харин регистрийн дугаар алдагдахаас сэргийлэх ажил хийнэ. Регистрийн дугаараар тухайн хүний хувийн мэдээллийг авч болох эрсдэлтэй. Улсын бүртгэлийн байгууллага жилд 250 мянга орчим иргэний үнэмлэхийг хэвлэж өгдөг. Үүнээс 110 мянга нь хаясан гээсэн тохиолдол байна. Тэгэхээр регистрийн дугаарыг ил биш далд хийх нөхцөлийг судалж ажиллаж байна” гэсэн.

Монгол Улсын Ерөнхий сайдын 2018 оны захирамжаар “Invest in Mongolia center” нэг цэгийн үйлчилгээний төвийг байгуулж гадаадын хөрөнгө оруулалттай хуулийн этгээдүүдэд улсын бүртгэлийн үйлчилгээг 2019 оны 4 дүгээр сараас өгч эхэлсэн. Тэгвэл өнөөдрийн байдлаар нийт 216 гадаадын хөрөнгө оруулалттай компани улсын бүртгэлийн байгууллагад бүртгүүлсэн байна.

2018 онд гадаадын хөрөнгө оруулалттай компани 483 байсан. Харин өнгөрсөн онд тэдгээр компаниуд дээр шалгалт хийсний эцэст 139 гадаадын хөрөнгө оруулалттай компанийн бүртгэлийг хүчингүй болгосон байна. Үндэслэл нь хуурамч бичиг баримт бүртгүүлсэн, хуулийн шаардлага хангаагүй зэрэг ажээ.