“Ам асуух” хөдөлгөөн У.Хүрэлсүхээс эхлэв”

Энэ үеэр Ардчилсан оюутны холбооны ерөнхийлөгч н.Лхагвадорж 2016 оны УИХ-ын сонгуульд нэр дэвшихдээ баримталсан мөрийн хөтөлбөр өнөөдөр ямар түвшинд хэрэгжиж байгаа талаар ярилаа. Энэ талаар тэрээр хэлэхдээ, “Манай холбоо нийгэмд хийж хэрэгжүүлэх ажлаа өнгөрөгч нэгдүгээр сард баталсан. Сонгууль болохоор даргыг дагаж далдагнадаг “пялдага” нэртэй соёл урлагийнхан, төрийн соёрхолт, бизнесменүүд, улс төрчид маш олон болсон байна. Сонгууль болохоор ард иргэдийн чихэн дээр хамгийн сайхан үг хэлдэг хэрнээ, бодитоор хэрэгжсэн ажил байхгүй. Албан тушаалын төлөө ард түмнийг доромжилж байгаа улс төрчид, соёлын зүтгэлтнүүдээс бид ээлж дараалан, шат дараатайгаар ам асууна. Шударга ёс ярьчихаад зөөлөн суудалд тухалсан ЗГХЭГ-ын дарга Л.Оюун-Эрдэнэ, УИХ-ын гишүүн Т.Аюурсайхан монголын ирээдүй болсон оюутнууд ам асуух болно. Хамгийн эхлээд бид УИХ-ыг удирдаж байгаа хүмүүсээс болон МАН-ын удирдагч, Ерөнхий сайд У.Хүрэлсүхээс “Ам асууя” хөдөлгөөнийхөө эхний асуултыг асууж байна. “2016 оны сонгуулийн мөрийн хөтөлбөрт хүүхэд бүрт хүүхдийн мөнгийг олгоно гэсэн боловч өнөөдөр тэгш эрхтэйгээр авч чадахгүй байна. Хүүхэд бүр цэцэрлэгт хамрагдана гэсэн ч олон мянган хүүхэд гэртээ цоожлогдоод үлдэж байна. Үндэсний тэтгэлэгт хөтөлбөр буюу монголын оюутнуудад чиглэсэн 70200 төгрөгийг үргэлжлүүлэн олгоно гэсэн ч 2016 оны есдүгээр сард буюу сонгуулийн дараа бүрмөсөн зогсоосон. Мөн оюутны дотруур байрын хүртээмжийг хоёр дахин нэмэгдүүлнэ гэсэн боловч нэг ширхэг ч дотуур байр шинээр баригдаагүй хэвээр байгаа. Монгол залуусаа сургаж дадлагажуулан ажлын байраар хангах бодлого барина гэсэн боловч өнөөдөр гадаадаас ажиллах хүч авах тухай, харь улсад монгол залуусыг ажилуулах тухай гэрээ байгуулаад сууж байгаа нь мөрийн хөтөлбөртэй тань нийцэж байна уу. Эсрэгээрээ гадаад руу зорих оюутан залуусын тоо жилээс жилд өсөн нэмэгдсээр байгаа” хэмээн ярилаа. Мөн тэд,

-Гадаадын сургуулиудаас Монголын оюутанд олгодог тэтгэлэг тэтгэмжүүдийг зогсоосон. Жирийн оюутан биш танил талаар тэтгэлэг авч байгаа нь хэр шударга вэ.

-Хот, аймгуудын гэр хороололд хийн түлшний хангамж болон хэрэглээг нэмэгдүүлж эко хот хөтөлбөр хэрэгжүүлэх замаар агаарын бохирдлбууруулна гэсэн. Гэвч өнөөдөр агаарын бохирдолд 580 гаруй тэрбум төгрөг зарцуулчхаад байна.

-Нийслэлийн иргэд эмнэлэгт үзүүлэх дугаараа интернет, гар утсаараа дамжуулан цахим хэлбрээр авдаг болон гэсэн боловч өнөөдөр нэг ч оочер дараалалгүй эмнэлэг хаана байна вэ.

-Ямар ч төрлийн татварыг нэмэхгүй, иргэдийн халаасыг хүндрүүлэхгүй гэж ярьж байсан. Гэтэл өнөөдөр бизнес хийж байгаа залуучууд зуу зуугаараа хаалгаа барьж байгаа гэдгийн санууллаа.

Ардчилсан оюутны холбооны хэвлэл мэдээллийн ажилтан н.Номин-Эрдэнэ: “Сонгуулиас сонгуулийн хооронд оюутнуудын тархийг угааж байгаа байдалтай. Үнэгүй хязгааргүй зорчдог байсан бол 2016 оны сонгуулийн дараа 22-хон удаа зорчдог болгож бууруулсан. Мөн тэтгэлгүүдийг бууруулсан. Төрийн албан хаагдчийн нэг хүүхдийн сургалтын төлбөрийг төрөөс даадаг байсныг зогсоосон. Шилдэг их дээд сургуулиудын тэтгэлгийг мөн л зогсоосон. Энэ мэтчилэн асуудлаас үүдэж бид урлаг соёл, улс төрийн хүмүүсээс ам асуух болно” гэв.