Онц хэрцгий аргаар хүний аминд хүрсэн этгээдийг баривчилжээ

Ахуйн хүрээнд архидан согтуурч, үл ялих шалтгаанаар маргалдаж улмаар хүний эрдэнэт амь насыг онц хэрцгий аргаар хөнөөх тохиолдол нийгмийг цочроон үйлдэгдсээр байгаа нь харамсалтай. Бид мэдээлэх үүргийнхээ хүрээнд гэмт хэрэг гарсан тохиолдлыг шалтгаан нөхцөлтэйгөөр нь хүргэсээр байгаа. Хамгийн сүүлд согтууруулах ундааны зүйл хэтрүүлэн хэрэглэсэн настай эмэгтэйг биеэ хамгаалах чадваргүй байдлыг нь ашиглан нийгэмд аюултай аргаар хөнөөсөн хэрэг гарлаа.

Хэргийг тодруулбал, Энэ  сарын 15-ны өдөр Баянзүрх дүүргийн нутагт орцны жижүүр ажлын байран дээрээ хоолойгоо хэрчүүлж бусдын гарт амиа алдсан аймшигт хэрэг гарсан. Эл аймшигт хэрэг Баянзүрх дүүргийн дөрөвдүгээр хороо “Монгол цэргийн музейн” хажуугийн нэгэн байранд болсон байдаг. Тухайн байранд орцны жижүүр ажилтай 67 настай эмэгтэйн хоолойг нь хэрчиж бүрэлгэсэн байсан талаарх дуудлага оройн 8:20 минутад ирсэн байна. Хэргийг урьдчилсан байдлаар хохирогчтой хамт архи уусан гэх 39 настай Л үйлдсэн байж болзошгүй нөхцөл байдал тогтоогдсон. Гэмт хэрэгтэн хохирогчийн амийг хөнөөсөн даруй хэргийн газраас зугтсан байжээ.

Хүн амины онц ноцтой хэргийн мөрөөр Баянзүрх дүүргийн цагдаагийн хоёрдугаар хэлтсийн алба хаагчид шуурхай ажиллаж 12 цагийн дотор гэмт хэрэгтэнг дайчлан баривчилжээ.

Албаны эх сурвалжийн мэдээллээр сэжигтэн хохирогчтой танилцаж улмаар согтууруулах ундааны зүйл хамт уусныхаа дараа хэргийг үйлдэж, зугтаад дараа нь Чингэлтэй дүүргийн нутаг дэвсгэрт бусадтай хамт архидан согтуурч байх үеэр нь цагдаагийн бүрэлдэхүүн барьсан гэв.

Дээрх гэмт хэрэг үйлдсэн этгээдэд Эрүүгийн хуулийн тусгай ангийн 10,1,2,1 дүгээр зүйл зааснаар хүний амь насыг санаатайгаар онц хэрцгий аргаар бүрэлгэсэн гэх зүйл ангиад хамааруулан яллах саналтайгаар шүүх рүү шилжүүлэх юм.

СЭРЭМЖЛҮҮЛЭГ: Иргэн та үл таних хүнтэй хамт согтууруулах ундааны зүйл хэтрүүлэн хэрэглэхгүй байх, бусадтай таарамжгүй харилцаа үүсгэж маргалдахаас зайлсхийх, ажлын байр болон гэр бүлийн хүрээнд архидан согтуурахгүй байхыг анхааруулж байна.