Ким Жон Унд Монголд айлчлах хүсэлт хүргүүлэв

Энэ онд Монгол, БНАСАУ-ын хооронд дипломат харилцаа тогтоосны 70 жилийн ой тохиож буй юм. Энэ хүрээнд Монгол Улсын Ерөнхийлөгч Х.Баттулга БНАСАУ-ын удирдагч Ким Жон Уныг Монгол Улсад айлчлахыг урьсан байна.

Ерөнхийлөгч Х.Баттулга урилгадаа “Манай хоёр улсын уламжлалт найрсаг харилцаа, хамтын ажиллагаа өнгөрсөн 70 жилийн хугацаанд олон салбарт өргөжин хөгжиж, эдүгээ бид Азийн бүс нутагт урт удаан хугацаанд нөхөрлөж ирсэн найрсан түнш улс орнууд болсон билээ.

Дипломат харилцаа тогтоосны түүхэн 70 жилийг тохиолдуулан хоёр улсын ард түмний найрамдал нөхөрлөлийг бэхжүүлэхэд чиглэсэн олон сайхан арга хэмжээг хоёр талаасаа амжилттай зохион байгуулж байгааг тэмдэглэхэд таатай байна. Таны өвөр эцэг, БНАСАУ-ын Их удирдагч Ким Ир Сен Монгол улсад албан ёсоор айлчилсан нь Монгол, Солонгосын харилцаанд түүхэн ач холбогдолтой үйл явдал байсныг тэмдэглэхийн ялдамд таныг манай улсад айлчлахыг урьж байгааг минь хүлээн авна уу.

Монгол улс, БНАСАУ-ын үе, үеийн удирдагчид бат бэх үндэс суурийг нь тавьсан манай хоёр улсын харилцаа хоёр орны ард түмний нийтлэг эрх ашиг, бүс нутгийн энх тайван, тогтвортой байдлын тус тулд цаашид ч өргөжин хөгжинө гэдэгт итгэл төгс байна. Эрхэмсэг ноён танд эрүүл энх, сайн сайхны ерөөл дэвшүүлэхийн ялдамд найрсаг солонгосын ард түмэнд хөгжил цэцэглэлтийг ерөөе” гэжээ.