Header Image

ХЭҮК Орхон, Булган аймагт ажиллаж байна

ХЭҮК Орхон, Булган аймагт ажиллаж байна

Монгол Улсын Хүний эрхийн Үндэсний Комиссын дарга Ж.Бямбадоржоор ахлуулсан Ажлын хэсэг энэ сарын 3, 4-нд Орхон аймагт ажиллаж “Хүний эрхийн нээлттэй өдөр” арга хэмжээг зохион байгуулж байна. Тус комиссын төлөөлөл өнөөдөр Орхон аймгийн Засаг дарга, ИТХ-ын дарга, ЗДТГ-ын дарга болон хуулийн байгууллагын удирдлагууд, болон өмгөөллийн байгууллагын удирдлагатай уулзалт-ярилцлага хийснээр арга хэмжээ эхэллээ.

Мөн иргэдэд үйлчлэх чиг үүрэг бүхий төрийн албан хаагчид болох аймгийн ЗДТГ, Иргэдийн төлөөлөгчдийн хурал, Засаг дарга нар, аймгийн Татварын газар, Эрүүл мэнд, нийгмийн даатгалын хэлтэс, Улсын бүртгэлийн хэлтэс, Хүүхэд, гэр бүл, залуучуудын хөгжлийн газар, Хөдөлмөр, халамжийн үйлчилгээний газар, Ерөнхий боловсролын сургууль, цэцэрлэгийн эрхлэгч, менежер, Нэгдсэн эмнэлгийн удирдлага, ажилтнууд, хуулийн байгууллагын ажилтнуудын төлөөлөл нийт 120 орчим хүнд хүний эрхийн сургалт явуулж байгаа аж.

“Хүний эрхийн нээлттэй өдөр” арга хэмжээг тус аймгийн Засаг даргын Тамгын газартай хамтран зохион байгуулж байгаа бөгөөд хөтөлбөрийн дагуу Цагдаагийн газрын Эрүүлжүүлэх, баривчлах байр, Шүүхийн Шийдвэр Гүйцэтгэх албаны Цагдан хорих байр, ШШГЕГ-ын харьяа Хорих 437 дугаар ангийн хүний эрхийн нөхцөл байдалтай танилцах юм байна. Мөн сүүлийн  гурван жилд аймгийн Засаг дарга, Иргэдийн Төлөөлөгчдийн Хурлаас гаргасан захирамж, тогтоол, шийдвэрт дүн шинжилгээ хийнэ.

Түүнчлэн охид, эмэгтэйчүүдийн нөхөн үржихүйн эрүүл мэнд, эрх болон байгаль орчин, уул уурхайн салбар дахь тулгамдаж буй асуудлаар мэдээлэл цуглуулах, дүн шинжилгээ хийж, холбогдох төрийн албан хаагчидтай уулзаж ярилцахаар төлөвлөөд байгаа аж.

Нээлттэй өдөрлөгийн хүрээнд нутгийн иргэдээс өргөдөл, гомдол хүлээн авч, хууль зүйн зөвлөгөө өгөх, гомдлыг шалгаж, шаардлагатай тохиолдолд газар дээр нь шийдвэрлэх арга хэмжээ авч ажиллах юм байна. Харин энэ сарын 5-6-нд Булган аймагт дээрх арга хэмжээг зохион байгуулахаар төлөвлөжээ.

Leave a Reply

Your email address will not be published.