Түрээсийн орон сууцанд хэнийг хамруулах вэ?

Түрээсийн орон сууцанд хэнийг хамруулах вэ?
 Төрийн орон сууны корпорациас өнгөрсөн оны гуравдугаар сард “Түрээсийн орон сууц” хөтөлбөрт хамрагдах хүсэлтэй иргэдийн материалын бүртгэлийг хийсэн бөгөөд энэ удаад хоёр дахь ээлжийнхнийг “Буянт-Ухаа 2” хорооллын 68.59мкв 3 өрөө 214 байранд эрэмбэлж оруулахаар ажиллаж байгаа ажээ.

Учир нь өнгөрсөн жилийн бүртгэлээр нийт 2600 гаруй иргэн материалаа бүрдүүлж өгснөөс 600 орчим нь түрээсийн байранд хамрагджээ. Харин 2000 орчим иргэн дараагийн түрээсийн байранд орохоор хүлээж байсан аж. Иймээс одоо хоёр дахь ээлжийнхнийг түрээсийн байранд хамруулах ажлыг зохион байгуулах юм байна.

Бүртгэлд хамрагдсан иргэдийн материал нэг жилд /12 сар/ хүчин төгөлдөр байх бөгөөд 2016 оны 3 дугаар сард бүртгүүлсэн иргэдийн материалын хүчинтэй хугацаа 2017 оны гуравдугаар сард дуусгавар болох ажээ.

Засгийн газраас түрээсийн орон сууцны санд орон сууц хуваарилсан тохиолдолд түрээсийн орон сууцны шинэ бүртгэлийн товыг албан ёсоор зарлах гэнэ. Бүртгэлийг иргэдэд чирэгдэл учруулахгүйгээр хязгааргүй хугацаагаар хийнэ. Бүрдүүлэх материалын жагсаалтыг http://tosk.gov.mn/4989.html линкийг дарж танилцах боломжтой юм.

“Төрийн түрээсийн орон сууц” хөтөлбөрт хамрагдах иргэд хэн бэ?

  1. Залуу гэр бүл
  2. Хувийн байгууллагад ажилладаг, хувиараа хөдөлмөр эрхэлдэг иргэн
  3. Ахмад настан,
  4. Хөгжлийн бэрхшээлтэй иргэн, түүнийг халамжилдаг гэр бүл
  5. Төрийн албан хаагч
  6. Өрх толгойлсон эцэг эх
  7. 18 хүртлэх насны дөрөв ба түүнээс дээш хүүхэдтэй гэр бүл
  8. Байгалийн гамшиг, гэнэтийн аюул осолд нэрвэгдэж орон гэргүй болсон өрх тус тус хамрагдана.

Түрээсийн байрны төлбөр хэд вэ?

Түрээсийн төлбөрийг Үндэсний статистикийн хорооноос гаргадаг өрхийн орлогын төвшингийн өөрчлөлтөөс хамаарч 1-2 жил тутамд шинэчлэн тогтоож байхаар журамд тусгасан аж. Энэ дагуу төрийн болон орон нутгийн өмчийн түрээсийн орон сууцны 2017 онд мөрдөх 1м.кв талбайн түрээсийн төлбөрийг нийслэлд 6.000/зургаан мянга/ төгрөг, орон нутагт 4.500/дөрвөн мянга таван зуу/ төгрөг байхаар тус тус шинэчлэн тогтоов.

Түрээслэгч нь түрээсийн гэрээ байгуулахдаа 3 сарын төлбөртэй тэнцэх барьцаа мөнгийг ТОСК-ийн дансанд байршуулна.

Бүртгэгдсэн иргэдээс хэнийг сонгон шалгаруулах вэ?

Түрээсийн орон сууцанд хамрагдах шаардлага хангаж, бүртгүүлсэн иргэдээс ЗОРИЛТОТ БҮЛГИЙН ИРГЭДИЙГ ТҮРЭЭСИЙН ОРОН СУУЦАНД ХАМРУУЛАХ ЖУРМЫН 2.2-т заасан ангилал, квот /хувь/-ын дагуу сонгон шалгаруулах ажлыг ЭРЭМБЭЛЖ зохион байгуулна. Тухайлбал,

…Хөгжлийн бэрхшээлтэй иргэн, түүнийг халамжилдаг гэр бүлийн ангилалд бүртгүүлсэн иргэдийг /ихээс нь бага руу эрэмбэлнэ./

  • Хөдөлмөрийн чадвар алдалтын хувь хэмжээ, зэрэг, төрлөөр
  • Хөдөлмөрийн чадвар алдалтын хувь хэмжээ, зэргээрээ адил иргэдийг хөдөлмөрийн чадвар алдсан хугацаагаар тус тус ангилна. Дэлгэрэнгүйг http://tosk.gov.mn/4989.html линкийг дарж танилцана уу.

Түрээсэнд хамруулах орон сууцны тухайд

Засгийн газрын 2016 оны 11 дүгээр сарын 30-ны өдрийн хуралдаанаар батлагдсан 169 дүгээр тогтоол, “Төрийн орон сууцны корпораци” ТӨҮГ-ын захиалгаар Улаанбаатар хот, орон нутагт баригдаж ашиглалтад орсон нийт 360 айлын орон сууцыг түрээсэнд хамруулж, метр квадратын хэмжээг 70м.кв болгон өөрчилсөн. Үүний дагуу Улаанбаатар хотод баригдсан “Буянт-Ухаа 2” хорооллын 68,59м.кв 3 өрөө орон сууцны байр болон Дархан-Уул, Хэнтий, Ховд, Увс аймгуудад захиалгаар бариулсан орон сууцны байруудыг тус тус түрээсэнд хамруулна.

Түрээсийн байрыг өмчлөх боломжгүй, харин “Түрээсийн орон сууц” хөтөлбөрт 5 хүртлэх жилээр гэрээ хийн хамрагдах боломжтой ажээ.

http://tosk.gov.mn/4989.html

Leave a Reply

Your email address will not be published.