Улаанбайшинт-Ховд-Ярант чиглэлийн нийт 756 км авто замын сүлжээг 2021 онд ашиглалтад бүрэн оруулахаар төлөвлөжээ

Улсын Их хурлын чуулганы хуралдаанд зам, тээврийн салбарт хийгдэж буй бүтээн байгуулалтын ажлын талаарх Ерөнхий сайдын мэдээллээс онцлон хүргэж байна.

Монгол Улс нийт 112,414.2 км авто замын сүлжээтэйгээс 14,918.7 км нь олон улс, улсын чанартай авто замын сүлжээнд хамаардаг бөгөөд үүний 48.5 хувь буву 7,227.5 км нь хатуу хучилттай зам байна.

Баянхонгор-Алтай чиглэлийн 126.7 км хатуу хучилттай авто замыг энэ оны аравдугаар сард ашиглалтад оруулснаар Говь-Алтай, Ховд, Баян-Өлгий аймаг нийслэл хоттой холбогдсон.

Түүнчлэн БНХАУ-ын хөнгөлөлттэй зээлийн хөрөнгөөр Тосонцэнгэл-Улиастай чиглэлийн 67 км хатуу хучилттай авто замын барилгын ажил гүйцэтгэл 75.4 хувьтай үргэлжилж байгаа юм. Уг замыг ирэх онд ашиглалтад оруулснаар бүх аймгийн төв Улаанбаатар хоттой хатуу хучилттай авто замаар бүрэн холбогдох юм.

Одоогоор авто замын салбарт улсын төсөв, гадаадын зээл тусламж, төр хувийн хэвшлийн хөрөнгө оруулалтаар энэ онд нийт 123 чиглэлийн 1,902.7 км авто зам болон 27 байршилд 1,376.6 у/м төмөр бетон гүүрийн барилгын ажил гүйцэтгэж байна. Мөн энэ онд 703.21 км авто зам, 1,000 у/м төмөрбетон гүүрийг ашиглалтад оруулахаар төлөвлөснөөс одоогоор 185 км авто зам, 668 у/м төмөрбетон гүүрийг ашиглалтад оруулжээ.

Авто замын салбарт 2020 онд хэрэгжүүлэхээр төлөвлөсөн зарим ажлын гүйцэтгэл дараах хувьтай байна. Тодруулбал,

улсын төсвийн хөрөнгө оруулалтаар хэрэгжиж буй нийт авто зам, гүүрийн барилга угсралтын ажил 90 хувь,
гадаадын зээл, тусламжийн хөрөнгө оруулалтаар хэрэгжиж буй нийт авто замын барилгын ажил 62 хувь,
төр, хувийн хэвшлийн хөрөнгө оруулалтаар хэрэгжиж буй авто замын барилгын ажил 45 хувийн гүйцэтгэлтэй байна.

Энэ онд ашиглалтад оруулах томоохон төсөл, арга хэмжээнээс танилцуулбал,

Улсын төсвийн хөрөнгөө хэрэгжиж буй Цахир-Тосонцэнгэл чиглэлийн 127.1 км хатуу хучилттай авто зам, Орхон-Хишиг-Өндөр сум чиглэлийн 12.82 км, Баян-Өлгий аймгийн төвийн 10.4 км хатуу хучилттай авто зам, Туул гол дээрх 205.1 метр урт, Баянхонгор аймгийн Галуут сумын Мандалын голын 62 у/м, Хэнтий аймгийн Баян-Адарга сумын Онон голын 150 у/м, Дадал сумын 238.9 у/м төмөрбетон гүүр,
Азийн хөгжлийн банкны зээлийн хөрөнгөөр хэрэгжиж буй “Баруун бүсийн босоо тэнхлэгийн авто зам хөгжүүлэх төсөл”-ийн хүрээнд Баруун босоо тэнхлэгийн авто замаас Мөст сум хүртэлх 20.3 км хатуу хучилттай авто замыг ашиглалтад оруулахаар төлөвлөжээ.

Манай улс 2004 онд “Азийн авто замын сүлжээний тухай Засгийн газар хоорондын хэлэлцээр”-т нэгдсэн. Хэлэлцээрээр хүлээсэн үүргээ үе шаттайгаар биелүүлж байна.

Энэ хүрээнд олон улсын авто замын сүлжээг олон улсын авто замын жишигт нийцүүлэн өргөтгөн хөгжүүлэх, тээвэрлэлтийн аюулгүй, үр ашигтай, тогтвортой үйлчилгээг бий болгох зорилгоор Азийн авто замын сүлжээний АН-4 чиглэлийн Улаанбайшинт-Ховд-Ярант чиглэлийн нийт 756 км авто замын сүлжээг 2021 онд бүрэн ашиглалтад оруулахаар төлөвлөн ажиллаж байна.