УИХ-ын гишүүн асан С.Баярцогт “Оюу толгой” ордыг ашиглах гэрээний 10 жилийн ой болж байгаатай холбогдуулан мэдээлэл хийж байна. Тэрбээр “Оюутолгойн гэрээг одоогоос 10 жилийн өмнө буюу 2009 оны аравдугаар сарын 06-ны өдөр байгуулсан. Уг гэрээ нь хоёр хөршийн ХО-аас давсан хөрөнгө оруулалт байсан төдийгүй зургаан сарын хугацаанд үүргээ биелүүлсэн. Тийм учраас юун түрүүнд С.Баяр, С.Батболдын Засгийн газрын гишүүдэд баяр хүргэе.
Оюу толгой төсөл нь олон жилийн туршид хэрэгжих дэлхийн хэмжээний томоохон бүтээн байгуулалт учир гэрээний хэрэгжилттэй холбоотой сорилт, бэрхшээл тулгарах нь гарцаагүй. Харин зөв гэрээ болсон гэдэг нь цаг хугацааны явцад харагдах болно. Иймд миний бие хууль тогтоогчид, шийдвэр гаргагчид, судлаачид болон олон нийтэд хүргэх зорилгоор “Оюутолгой төслийн 2009 оны гэрээ, холбогдох баримт бичгүүд” гэх 500 гаруй хуудастай товхимолыг гаргалаа. Үүнд гэрээтэй холбоотой бүх баримтууд бий. Яагаад заавал товхимол гаргах болсныг гайхаж байгаа байх.
2018 онд АТГ-аас Оюутолгойн гэрээтэй холбоотойгоор надад Эрүүгийн хэрэг үүсгэн, тэр даруй 73 хоног хорьсон. Яллагдагчаар татсан үндэслэл нь Монголд ашигтай болгох байсан нэг заалтыг болон 443 тэрбум төгрөгөөр нэмэгдүүлсэн арга хэмжээ хоёрыг буруутгасан. Үүнийхээ дараа АТГ-аас гэрээг байгуулахдаа хөрөнгө оруулагч талд давуу байдал олгосон байж болзошгүй гэх эрүүгийн хэрэгт мөрдөн шалгах үйл ажиллагааг явуулахдаа 4 бүлэг шинжээчийн дүгнэлтүүд гаргасан. 4 бүлэг шинжээчдээс 3 нь Оюутолгой төслийн 2009 онд байгуулсан Хөрөнгө оруулалтын гэрээ, Хуль нийлүүлэгчийн гэрээ, 2011 онд байгуулсан Нэмэлт өөрчлөлт оруулж, дахин тодотгосон хувь нийлүүлэгчийн гэрээтэй холбоотой сөрөг дүгнэлт гаргаагүй. Харин уг гэрээний хэрэгжилтийг хангах үүрэгтэй ТЕГ-ын таван байцаагчаас бүрдсэн шинжээчийн баг улсад их хэмжээний хохирол учруулсан гэх алдаатай дүгнэлт хийсэн” гэв.
+ There are no comments
Add yours