Уулнаас баавгай буусан тохиолдлууд ойрын хугацаанд гарч буй. Үүнийг байгаль орчны мэргэжилтнүүд хэлэхдээ, хоол тэжээл нь ховордсоны улмаас хэмээн тайлбарласан.
Тэгвэл, Байгаль орчин, аялал жуулчлалын сайдын тушаалаар 2020 оны есдүгээр сарын 01-нийг хүртэл хуш модны самар түүж бэлтгэх, худалдан борлуулах, экспортлохыг хориглоод байгаа юм.
Нийслэлийн ногоон бүсийн ойн сан нь “Ойн тухай хууль”-д заасны дагуу экологи-эдийн засгийн ач холбогдлоороо хамгаалалтын бүсийн ойд хамаардаг. Ногоон бүсийн ой нь байгалийн аясаар ургасан ой бөгөөд шинэс, хуш, нарс, хус зонхилж улиангар, гацуур, улиас, бургас харьцангуй бага талбайд тархсан байдаг. Ойн сангийн талбай 116.257 га, үүнээс ойгоор бүрхэгдсэн талбай 95.234 га, ойгоор бүрхэгдээгүй талбай 17.534 га, ойн бус талбай 3.480 га байна. Үүнээс 16.520 га талбай буюу 17,3 хувийг хушин ой эзэлдэг. Жил бүрийн намар иргэд олноороо хотын ногоон бүсийн ойд зорчиж, ойн дагалт баялаг болох хушны самар түүдэг тул 2020 оны есдүгээр сарын 01-нийг хүртэл дээрх зорилгоор зорчихгүй байхыг Нийслэлийн Байгаль орчны газраас анхааруулж байна.
Хуш модны ургалт, самар түүх явцад байгаль орчинд учруулдаг сөрөг нөлөөллийг бууруулах зорилгоор хэрэгжүүлж буй шийдвэрийг дэмжиж, зөрчлийн мэдээллийг Нийслэлийн Байгаль орчны газрын байгаль хамгаалагчид болон байгаль орчны зөрчил гомдлын мэдээлэл хүлээн авах “Зуслан” аппликэйшнээр дамжуулан ирүүлэхийг уриалж байна. Самар түүж бэлтгэсэн гэм буруутай этгээдээр экологи-эдийн засгийн үнэлгээгээр тогтоогдсон мөнгөн дүнг гурав дахин нэмэгдүүлсэнтэй тэнцэх хэмжээгээр нөхөн төлүүлдэг гэлээ.
+ There are no comments
Add yours