Ашигт малтмалын тухай хуулийн нэмэлт, өөрчлөлтийн төслийг УИХ-ын нэгдсэн чуулганаар хэлэлцэхээр төлөвлөөд байна. Засгийн газраас хэлэлцүүлэхээр өргөн мэдүүлсэн хуулийн төсөлд алтны нөөц ашигласны төлбөр болох 2.5 хувийг таван жилээр сунгах заалт тусгагдаад байгаа. Уг 2,5 хувийн рояалти нь ирэх оны нэгдүгээр сарын нэгнээр дуусгавар болохоор байгаа билээ.
Цаашид алт худалдан авалтыг тогтвортой өндөр түвшинд байлгахад ашигт малтмалын нөөц ашигласны төлбөрийн 2.5 хувийн хөнгөлөлтийг үргэлжлүүлэх шаардлагатай гэж Монголбанк үзэж байна. Татварын хөнгөлөлт хэрэгжиж эхэлсэн сүүлийн таван жил Монголбанкны худалдаж авсан алтны хэмжээ өссөөр 2017 онд 20 тонн буюу түүхэн дээд хэмжээнд хүрчээ. Энэ онд 22 тонн хүргэх зорилт тавиад байгаа гэж Монголбанк онцолж байсан юм.
Алтны салбарынхан төв банканд алтаа тушаахдаа Ашигт малтмалын нөөц ашигласны төлбөр болгож, 2.5 хувийн татвар төлдөг. Өмнө нь гэнэтийн ашгийн 68 хувийн татварыг буулгах замаар АМНАТ-ийг 10 болон 5 хувь руу оруулан бууруулж байв. Гэвч энэ нь хангалттай дүн биш гэж үзэж, 2014 оны нэгдүгээр сарын нэгний өдрөөс АМНАТ-ийг 2.5 хувь болгон үнэмлэхүй бууруулсан юм.
Монголбанк 2019 оны Мөнгөний бодлогын үндсэн чиглэлдээ гадаад валютын албан нөөцийг хүрэлцээтэй хэмжээнд хүргэх бодлого баримтлахаар тусгаад байна. Энэ хүрээнд алт худалдан авалтаар гадаад валютын албан нөөцийн 750 орчим сая ам.долларыг энэ онд бүрдүүлээд байгаа юм. Олон Улсын Валютын Сангийн дүгнэснээр Монгол Улсын гадаад валютын албан нөөцийн хэмжээ хангалттай түвшинд хүрээгүй байгаа бөгөөд энэ утгаараа Монголбанк цаашид гадаад валютын албан нөөцийг багадаа 6.5 тэрбум ам.долларт хүргэх зорилт тавиад байна.
12 дугаар сарын тавны өдрийн байдлаар Монголбанк 19.8 тонн алт худалдан авсан нь өмнөх оны мөн үеэс 3.2 хувиар өссөн үзүүлэлт боллоо. Мөн аравдугаар сарын 15, 18-нд орон нутагт байгуулсан алтны сорьц тогтоох, худалдан авах нэг цэгийн төв байгуулснаар Дархан-Уул аймагт 107 кг, Баянхонгор аймагт 46 кг алт тус тус худалдан авчээ.
+ There are no comments
Add yours