Солонгосын хүнсний бүтээгдэхүүн худалдаалдаг сүлжээ дэлгүүрт хуурамч хугацаатай бүтээгдэхүүн худалдаалж байсныг илрүүлсэн байна. Энэ талаар Босоо хөх монгол хөдөлгөөний тэргүүн А.Ганхуягаас тодруулав.

-Солонгосын хүнсний сүлжээ дэлгүүрээс хуурамч хугацаатай бүтээгдэхүүн худалдаалж байсныг илрүүлсэн талаар тодруулах гэсэн юм?

-Ханару гэдэг хүнсний дэлгүүрт хуурамч хугацаатай маш олон төрлийн хүнсний бүтээгдэхүүн худалдаалж байсныг илрүүлэн, нийслэлийн мэргэжлийн хяналтын газарт хандаж, хамтдаа шалгаад битүүмжлүүлээд байна.

-Хэчнээн төрлийн бараа бүтээгдэхүүн байсан бэ?

-Төрлийг яг тэд гэж хэлэх боломжгүй байна, одоогоор. Наймаалж, далайн байцаа, цуу, хиам, хятад, солонгос ресторанд өргөн хэрэглэдэг хоол амтлагчууд гэх мэтээр маш олон төрлийн хүнсний бүтээгдэхүүнүүд байна. Мөн Хан-Уул дүүрэгт байдаг маш том агуулах дүүрэн хугацаа нь дууссан хүнсний бүтээгдэхүүн байна. Мөн төв дэлгүүр Ханаруд нь байгаа бараануудынх нь хугацаа бас дууссаныг хуурамч хугацаа наагаад сольчихсон зарж байсныг илрүүллээ.

-Ийм олон бүтээгдэхүүнийг ийм их хэмжээгээр хилээр яаж оруулж ирдэг байна аа?

-40 тоннын чингэлэгт хайрцаглаж оруулж ирдэг юм байна. Тэгээд агуулахдаа буулгаж байгаад хугацааг нь өөрчилж, хүнсний дэлгүүр, сүлжээ ресторануудад борлуулдаг байсан бүлэг сүлжээ хүмүүсийн ажил байна л даа.

-Солонгос эзэн нь хэн бэ?

-Пак Дун Вон гэж Ханару супер маркетийн эзэн солонгос хүн байна. Өөр солонгос хүмүүс ч бас байгааг үгүйсгэхгүй.

-Монголчууд холбоотой юу?

-Одоогоор солонгосчууд л байна. Мэдээж дэлгүүр, агуулахад нь ажилладаг хүмүүс монголчууд байна. Худалдагч, кассчин, нярваар ажилладаг монголчуудыг дарамталж, хугацааг нь солиулдаг байсан байна.

Агуулах, дэлгүүрийг нь битүүмжилсэн үү. Мэргэжлийн хяналтаас ямар хүмүүс ажиллаж байгаа вэ?

-Нийслэлийн мэргэжлийн хяналтад бид дуудлага өгөөд ирж ажилласан. Маш том агуулахад нь шалгалт хийж, зөрчил илрүүлэн битүүмжилж, лацадсан. Мөн төв дэлгүүрт нь ирж үзлэг шалгалт хийхэд мөн зөрчил илэрсэн учир бас битүүмжилж, лацадсан байгаа. Манай хөдөлгөөнийхөн хөндлөнгийн ажиглагчаар орж ажиллалаа.

Сэтгүүлч Д.Пүрэв

Сэтгэгдэл үлдээх

Leave a Reply

Your email address will not be published.

Confirm that you are not a bot - select a man with raised hand:

This site uses Akismet to reduce spam. Learn how your comment data is processed.