Шадар сайд У.Хүрэлсүхийг мөрдөн мөшгиж, тагнаж чагнасан гэх хэргийн гэрч гэгдэж байсан Ч.Батболдыг цагдан хорихоор боллоо. Түүнийг өчигдөр баривчилсан бөгөөд өнөөдөр шүүх хурал болж, Ч.Батболдыг нэг сар цагдан хорьж, шалгах шийдвэрийг Чингэлтэй дүүргийн шүүхээс гаргалаа. Шүүхээс түүнийг хэргийн гэрч бус холбогдогч хэмээн үзэж, Эрүүгийн хуулийн 13.12 буюу хууль бусаар мөрдлөг хийсэн гэх хэргээр яллагдагчаар татлаа.
Тодруулбал, Нийслэлийн Прокурорын газраас Ч.Батболд, Б.Энхмэнд, Н.Адъяахүү, А.Бат-Эрдэнэ нарт Эрүүгийн хуулийн ерөнхий ангийн 3.1 дүгээр зүйлийн 2 дахь хэсэг, 3.5 дугаар зүйлийн 1 дэх хэсэгт заасныг тус тус журамлан мөн хуулийн тусгай 13.12 дугаар зүйлийн 1 дэх хэсэгт зааснаар, О.Амарсанаа, Ц.Жаргалсайхан нарт Эрүүгийн хуулийн тусгай ангийн 22.1 дүгээр зүйлийн 1 дэх хэсэгт зааснаар тус тус ял сонсгож, яллагдагчаар цагдан хориулах саналыг Чингэлтэй дүүргийн Эрүүгийн хэргийн анхан шатны шүүхэд ирүүлсэн. Тус шүүхийн шүүгчийн 2017 оны 08 дугаар сарын 11-ний өдрийн дугаар захирамжаар Эрүүгийн хэрэг хянан шийдвэрлэх тухай хуулийн дагуу дээрх нэр бүхий яллагдагч нарыг тус бүр 1 сарын хугацаагаар яллагдагчаар цагдан хорих таслан сэргийлэх арга хэмжээ авсан байна.
Ч.Батболдын өмгөөлөгч энэ хэрэгтэй холбоотойгоор долоон хүнийг хорьсон гэх мэдээлэлтэй байгаа аж. Мөн тэрбээр “Батболд өөрөө тухайн хэргийн тухай хуулийн байгууллагад мэдэгдэж, хэргийг илрүүлэхэд туслалцаа үзүүлсээр байхад цагдан хорьж байгаа нь Эрүүгийн хуулинд заасан үндэслэл, зарчимд нийцэхгүй байна. Тиймээс ерөнхий шүүгчид гомдол гаргана” гэсэн мэдээллийг өгөв.
Ч.Батболд одоо цагдан хорих 461 дүгээр ангид хоригдож буй аж.
Д.Думаа
+ There are no comments
Add yours