МУИС-ийн харьяа Байгаль-Эх лицей сургуулийн багш нараас Хүний эрхийн Комисст талархлын захидал ирүүлжээ. Тус захидалдаа “Өнөөгийн энэ нийгэмд ажиллаж амьдарч байгаа жирийн багш нарын эрх ашиг янз бүрийн байдлаар зөрчигдсөөр байна. Ийм нөхцөл байдалд орсон бидний хэдэн багш нар өөрийн болоод сургууль хамт олныхоо нэрийг гарган байж бүтэн нэг жилийн турш маш олон байгууллагын хаалгыг татаж асуудлаа шийдүүлэхийг оролдсон боловч бүр ч их дарамтанд орох болсон.  Харин та бүхэн бидний цөхрөөд байсан итгэлд гал хайрлаж, бидний хүн ёсны эрх ашгийг хамгаалахын төлөө хичээл зүтгэл, сэтгэл гарган ажиллаж, үнэн худлыг ялган салгаж өгсөн нь бидний багш нар төдийгүй бидний гэр бүлд баяр баясгалан, цаашдын ажил амьдралд маань маш их урам зориг авч ирлээ.  Бидний адил нөхцөл байдалд орсон хүн ардынхаа төлөө гэсэн та бүхний үйлсэд өндөр амжилт хүсэж улам улам олон олон хүмүүст аз жаргалтай, тайван амьдрах эрх боломжийг олгоорой гэж чин сэтгэлээсээ ерөөе. Та бүхний итгэл хайрласан багш нараас” гэжээ.
Байгаль-Эх лицей сургуулийн нэр бүхий багш, сурагчдын эцэг эхийн төлөөллийн зүгээс “хүүхдүүдийн сурч боловсрох эрх, багш ажилтнуудын хөдөлмөрлөх эрх зөрчигдөж байгаа тухай болон тус сургуулийн удирдлага, багш, ажилтнуудын зан харилцаа, ёс зүйн зөрчлийн талаар” Комисст 2017 оны 5 дугаар сард гомдол гаргасан юм.
Гомдлын дагуу тус 2017 оны 5 дугаар сарын 23-ны өдөр Комиссоос хяналт шалгалт хийхэд тус сургуулийн удирдлага багш, ажилтнуудтай ёс зүйгүй харьцдаг үндэслэлгүйгээр цалин урамшууллаас хасах, ялгаварлан гадуурхах үйлдэл гаргасан нь тогтоогджээ. Шалгалтаар илэрсэн хүний эрхийн зөрчлийг арилгуулах, хөдөлмөрийн харилцаанд багш, ажилтнуудыг ялгаварлан гадуурхах, ажлын байрны дарамт үзүүлж буй асуудлыг таслан зогсоох, цаашид энэ төрлийн зөрчлийг гаргахгүй байхад анхаарч ажиллах, зөрчил гаргасан этгээдэд холбогдох арга хэмжээ авхуулахаар Комиссын гишүүний шаардлагыг МУИС-ийн захирал Я.Төмөрбаатарт 6 дугаар сарын 27-нд хүргүүлсэн байна.
МУИС-ийн дэд захирал Б.Очирхуяг Комисст ирүүлсэн хариу албан бичигтээ ”Багш, ажилтнууд ээлжийн амралттай байгаа тул 2017 оны 8 дугаар сарын 28-аас хойш шаардлагын дагуу тодорхой арга хэмжээ авч, Монгол Улсын Хүний эрхийн Үндэсний Комиссын тухай хуульд заасны дагуу хариу мэдэгдэнэ гэдгээ илэрхийлсэн байна.

Г.Гэрлээ

Сэтгэгдэл үлдээх

Leave a Reply

Your email address will not be published.

Confirm that you are not a bot - select a man with raised hand:

This site uses Akismet to reduce spam. Learn how your comment data is processed.