Олон улсын хүүхдийн эрхийг хамгаалах өдөр дөхөж байгаатай холбогдуулан Нийслэлийн мэргэжлийн хяналтын газраас өнөөдөр мэдээлэл хийлээ. Эх үрсийн баярыг угтан урьдчилан сэргийлэх хяналт шалгалтыг нийслэлийн есөн дүүрэгт явуулжээ. Шалгалтын үеэр нийт 211 зөрчил илрүүлснээс 104-ийг газар дээр нь арилгуулж улсын байцаагчийн 30 заалт бүхий дөрвөн албан шаардлага хүргүүлсэн байна.
Хяналт шалгалтын явцад шаардлага хангахгүй нөхцөлд хадгалж худалдаалсан болон хугацаа нь хэтэрсэн 74 нэр төрлийн, 448 ширхэг, 1.565.710 төгрөгийн бүтээгдэхүүнийг хураан авч устгуулах арга хэмжээ авчээ. Үүнээс 69 нэр төрлийн, 1.444.910 төгрөгийн бүтээгдэхүүн нь хугацаа хэтэрсэн байж. Үүнд ундаа, жүүс, сок, гаа, бохь, шоколад, набор, кесел, чокопай, резинэн чихэр, модон чихэр, тоглоомтой чихэр зэрэг багтжээ.
Уг зөрчлийг өмнөх оны шалгалтын дүнтэй харьцуулахад зөрчил дутагдал харьцангуй багассан нь аж ахуйн нэгж байгууллага, иргэдийн хүнсний бүтээгдэхүүнийг хэрхэн хадгалах, сонгож авах талын мэдлэг нэмэгдсэнтэй холбоотой гэж мэргэжилтнүүд дүгнэсэн юм.
Баярын өдрөөр хүн ихтэй газруудад хүнсний бүтээгдэхүүн худалдаалах тохиолдол олон байдаг. Тиймээс НМХГ-аас хүүхдүүддээ бэлэг сонгохдоо анхаарах зүйлсийг эцэг эхчүүдэд зөвлөмж болгон гаргасныг хүргэж байна.
– Боосон бэлэг дотор байгаа хүнсний бүтээгдэхүүний үйлдвэрлэсэн болон хадгалах хугацааг нэг бүрчлэн үзэж шалгах
– Хаана үйлдвэрлэсэн нь мэдэгдэхгүй, хаяг шошгыг унших боломжгүй, эргэлзээтэй бүтээгдэхүүн сонгохгүй байх.
– Хэт их чихэрлэг бүтээгдэхүүн сонгохгүй байх. Дундаж хэмжээтэй ундаа жүүсэнд гэхэд ойролцоогоор 50-80гр сахар агуулагддаг бөгөөд энэ нь таны хүүхдэд шүд өвдөх, харшил үүсгэх богино хугацааны нөлөөтэйгөөс гадна цаашлаад зүрх судас, бөөрний өвчлөлд нөлөөлөх сөрөг үр дагавартай юм.
– Амархан муудах, хадгалалтын нарийн горим шаарддаг бүтээгдэхүүн боосон бэлгийг худалдан авахгүй байх. /Жишээ нь, бүржмэл чихэр, кремтэй нарийн боовны төрлийн бүтээгдэхүүн гэх мэт/
– Хямдрал нэрийн дор худалдан борлуулж буй хүнсний бүтээгдэхүүний хугацааг сайтар харж авах,
– Бялуу, хиам зайдсан бүтээгдэхүүн, өндөг гэх мэт түргэн муудах хүнсний бүтээгдэхүүнийг хөргөгчний хэмд хадгалж, тэр өдөртөө хэрэглэж дуусгах.
-Гадаа аагим халуун болж, агаарын хэм +31 хүрч байгаа энэ үед худалдан авсан хүнсний бүтээгдэхүүнээ автомашиндаа хадгалахгүй байх.
-Хүүхдүүдийг хөдөлгөөнт автомат тоглоом дээр тоглуулахдаа аюулгүй байдлыг бүрэн хангуулах буюу хувь хүмүүсийн баталгаагүй, зориулалтын бус тоглоом дээр тоглуулахгүй байх.
-Нарны хурц туяанаас хамгаалж, малгай, нарны хаалт тогтмол хэрэглэх, наршихаас хүүхдүүдийг хамгаалах.
-Хүүхдийг гадаа тоглосны дараа болон гаднаас орж ирсний дараа даруй гарыг савандаж угаалгах хэрэгтэйг анхаарууллаа.
Г.Гэрлээ
+ There are no comments
Add yours